Dear All,

你們好嗎?? 我返來啦，好耐冇見呀．我都好掛住你地呀，多謝你們咁關心我，相信各位準媽媽都差唔多生得啦．

講番我啦，本來唸住同你地一齊食buffet,但因為產檢發現有妊娠毒血症，所以要即刻入院，據了解依個病話係因為壓力和情緒影響．而bb 就要早產．我本來唸住在法國醫院生，但係因為知道亞b 出世之後要留院，所以最終決定在廣華．
在醫院住左個多星期之後，醫生一直觀察我的情況，當然希望可將時間拖長一點才進行開刀手術．但係亞ｂ似乎等唔到囉，在三月九號果晚，佢就自己出左來，我夜晚九點幾鐘開始有小小痛，不過我都唔係好為意，仲以為自己食錯野，點知起身去洗手間之際，就見到將床有紅啦，之後亞姐就推我去產房，大概十點幾左右．在產房的時候好真係好痛，不過我都冇大叫，一直忍住，因為驚自己冇氣生．最後，亞b 在夜晚十一點幾就出世啦．
而亞b在醫院已經住左一個月，剛剛出院啦，之前出世只有三磅，而家終於都有五磅啦，雖然細粒的，不過總算沒有大問題．不過，佢始終係早產bb,要不停覆診同埋食藥，當然亦要特別悉心照顧啦．  

至於我呢，在生完之後，我返左媽咪度坐月，之後就返左來屋企，返到來之後，就發現有人上過來，而老公就即刻搬野走，佢而家搬走左啦．而我們已經賣左層樓，在六月底交吉，而我暫時會搬番媽咪度，不過遲的都要找屋．我在坐月期間，一直都瞓唔到，亦發同一個惡夢，直到返來屋企之後，情況似乎更嚴重，時時會在屋企喊，亦有發惡夢的情況．一直以來，都以為自己可以捱得到，但在果時，真係好辛苦，好似物都冇左，一時之間，好多野要處理，心情都唔知點樣去調節，於是，我去左見心理醫生．我同自己講，為左自己，bb, 身邊的人同朋友，我都一定要繼續撐，而為左撐落去，我唯有去見心理醫生，希望將自己先處理好，我而家好的啦，你地唔駛擔心我，雖然重有發惡夢，不過至少冇時時喊．

至於C6, 一個人變左心真係可以幾恐怖,朋友曾經以為我未放低，以至一直都好唔開心，不過，其實係一種心理的傷害同陰影，以至有咁的產後抑鬱．在我懷孕期間，見紅，肚痛，佢都可以唔番來．什至有次我在屋企暈左，朋友找到佢，佢都可以唔番來，我之後因為太驚，在年三十晚，曾經試過在街行，在地鐵站坐，都唔想返屋企，心理上覺得在街會安全過在屋企，實在好諷刺．佢仲在屋企住的時候，可以同人細聲講，大聲笑，夜晚半夜都可以不停SMS同電話, 在醫生通知我要入院的一刻，我都係自己入院，佢果日都冇出現亦唔聽電話. 到我真係生亞b 的時候，佢亦都唔在醫院等．直至我生完，坐月期間，當然冇理過我啦．最後返到來屋企，就發現女人上過來，而佢就即刻搬野走．
依的一切一切已經成為過去啦，我曾經好唔開心，心痛， 不過而家總算可以平伏，只希望依的所有陰影會隨時時間慢慢過去，我會重新做人亦會好好對待自己，希望活得更好．

至於亞b, 我地都決定左由佢湊，其實正確來講，係爺爺加工人湊．我了解到自己的精神狀態同經濟能力，我只可以咁樣做 ．暫時來講，佢亦對亞b有照顧，不過當然男人一定唔及女人細心啦．不過，我一定會時時去睇亞b同埋處理佢的野．

在bk識到你們，我真係好開心，雖然我地未見面，不過真係好多謝你們一直給予我精神上的支持同鼓勵．
我之前搞左個tea buffet,點知無緣join 你們，希望之後再有機會啦．你們無論係唸住開刀定自然生，都要小心的呀，因為亞b先要係”老細”係佢話事幾時出來的，所以自己要小心的，叫老公貼身陪住你地呀，如果好似我亞b咁快就出世的話，你地真係唔可以沖埋涼，食個麵先去醫院．