老友反駁話﹕「唔係呀，你買股票，就算自己唔借孖展，但你買的公司會借錢，所以已經間接有借貸，好似新鴻基地產咁，主要做地產生意，公司又有借貸，買佢都有槓桿呀，和買樓無分別﹗」

　　 18年過去，新地當年股價約20元，今日83.5元，1元變4元以上。太古城如今近4000元一呎，當年的800呎樓，今日樓價近４００萬，升了一倍，但以投入20萬元本金計，升值部份有220萬，1元變11元。表面看，股價升幅跑贏樓價，但加上桿槓的效應，買樓收穫更大。

　　你可以話我無計清楚條數，買樓借了錢要月月供，買股無借錢仲有息收，如果買股夠膽借孖展，用股息抵銷部份孖展利息，貼上差額，同供樓一樣，到頭來回報仲大。

　　你咁講我唔可以話你錯，但金融機構對待樓宇按揭和股票孖展態度不同，對樓按態度鬆，即使跌到負資產，只要你期期供樓，就無人來迫你﹔但股票一急跌，就要你補孖展差價，要補夠按金額，否則二話不說就斬倉。即使你18年前借9成錢買新地，如果不夠實力補倉，當中經過幾個跌市，已把你掃出局。

　　買股幾十年得個桔

　　講開買樓好，還可以講一個成功例子，有個老友是投資賓卡，20幾年前開始買愉景灣樓自住，由幾十萬一間樓買起，愈換屋愈大，每一次貼100、200萬差價，換了3次，換成3000呎連巨園的大屋，如今市值超過3000萬，本金投入可能只是300、400萬，其餘就是供款，這就是劉創楚教授講「細屋換大屋」成功例子，這種成功案例所在多有。表面看，否定了《富爸爸窮爸爸》作者話唔好買靚樓自住的理論。

　　大廚股假到離譜

　　所有投資都有風險，買股最壞的情況是得番一張牆紙，買樓卻有一舊磚頭，即使樓價跌，但守住舊磚頭，守守又會有咁上下價值，相對有渣拿。

　　很多人買股票，幾十年炒炒，結果一無所獲。網友rich講的情況是一個典型，他說﹕「我買了20年股票，唯一最賺錢亦是控（005），記得87及89年股災後，控股價under $4.5!!!可惜又買又賣，賺不多!!從2000年起，我已經只買不賣了!!」

　　很多「熱炒股」其實是一個局，由幕後大戶操縱，安排買賣，造高成交，讓散戶看到交投活躍、股價節節上升的假象，咩咩聲入市，股價脫離任何人類能想像的基本因素，但人人只相信股價明天會更高，就不問情由，瘋狂炒作。

　　記得年前有一隻大廚股，高潮時每天成交超過１億元，成交金額超過控，陸羽仁當時就覺得好好笑，心想﹕「有無假得咁離譜，成交大到咁，咁都有人信﹖」

　　據說大廚股的成交完全由大廚指揮，大廚叫靚太甲在2元大手入貨，2.4元先至好沽，又叫靚太乙在2.4元接貨然後，在2.8元先好沽。靚太甲唔聽話，2元買升到2.2元，未等到2.4元，明知是假局，就忍唔住偷偷地沽些貨，怎料一沽貨出街，大廚的電話就到，質問她為甚麼偷步出貨﹖靚太甲啞口無言，唯有買番轉頭。經此一役，靚太甲就知道，大廚股的交易，有95％由大廚自己安排，引散戶入市做其餘5％成交，所以一有大手買賣，大廚立即知道有自己友唔生性出貨，立刻打電話警告，再唔聽話就移動你。

　　大廚叻到用「搭棚」炒股的方法，用到炒樓之上，安排靚太們去買自己的商廈單位，亦是一級一級咁接上去，將單位價錢炒到天價。

　　經濟成熟賺錢難

　　 不過大廚炒股炒樓炒得太誇張，價錢高到離譜，對地心吸力的抗跌力特弱，一個浪打過來，就令大廚翻艇，跟他炒股炒樓的人，個個輸到雞毛鴨血。這些炒股在市場上比比皆是，買股者好易中招。

　　 所以話真正懂炒股的高手，會覺得炒股好過炒樓，炒股轉身更快，手續費低，唔駛麻煩打理﹔而且他們炒股從來不炒控，買控一年十個八個巴仙回報，不是他們杯茶。不過話得說回來，真正懂炒股的高手萬中無一，如果大家照鏡，自知不屬此類時，買股票就要買得穩陣一些，甚至會發覺一二十年下來，買股輸多贏少，最叻打個和，反而買樓自住，最後回報仲好。

　　 九七過後，香港人慢慢會發覺，經濟步入成熟期，要投資賺大錢，比以前困難得多了。不過買層樓自住，迫自己儲錢供樓，總好過賭馬、賭波、賭股輸清光呀﹗

　　陸羽仁